Breaking News:Hakha Thar ah Minung 19 tlaih an tong,phaisa nuai 4 fai an fir pingah inn pakhat an kah rih

Falam lei in nizan a rak phan mi SAC ralhrang hna nih Hakha Thar ah a ummi khua mi minung 19 nizan (October 20) ah an tlaih hna i cu an tlaih mi cung ah kum saupi zawtnak a tuar cang mi telh in nu 6 le ngakchia kum 4 pa zong aa tel tiah kan theih.

Ralhrang SAC nih Hakha Thar um Pu Ral Lan innkar le Special Intelligence Bureau (sah-tung-lung) zung karlak ah bomb kan hmuh tiah an ruang an i pekter i Pu Ral Lan telh in a nupi, a far le a fale dihlak minung pariat le inn pa inn (3) in minung pariat an tlaih hna. Cun sah-tung-lung zung a sa lio mi minung pathum zong an tlaih hna.

Cu an tlaih mi hna chung ah kum tampi zawtnak ‘thi lay-phet-na’ a tuar mi kum 20 fai nu pakhat aa tel. Ngakachia kum 4 pakhat aa tel pin ah Pu Ral Lan telh in Covid in a zaw mi a chungkhar minung 5 zong an i tel,” tiah Hakha Thar ummi nih TCP sin ah a chim.

An tlaih mi chung ah kum 4 ngakchia pa cu an thlah colh. Pa dihlak cu Rungtlang ah an kai pi hna i nu paohpaoh cu palek leeng ah an hren hna. Covid a zaw mi chung in pahnih cu an zual pah pin ah Oxygen Level zong a tla mi an si tiah kan theih.

Cu pin ah tlaih a tong mi inndawng pakhat chung in tangka sing 40 renglo, suithi le sui tumbul zong an lakpiak hna.
Tuzing (October 21) zong ah Hakha Thar cerhtual pawng ah a ummi inn pakhat cu nizan kan motor hmantlaknak inn a si tiin SAC ralhrang hna nih meithal in an kah i inn tlawmpal te a pem.

Minung cu a hliamh hna lo tiah kan theih. October thla thok in nihin tiang ah Hakha khuachung lawng in tlaih mi minung 50 renglo an si cang i tam deuh cu an thlah than hna tiah CHRO sin in kan theih. Credit:The Chinland Post

Be the first to comment

Leave a Reply

Your email address will not be published.


*