By-Pu Ram Kulh Cung bia roling nih na nunnak ah thazaang an pek ve hrim lai

Miphun sernak lam pakhat cu raltuknak a si. Vawleicung i khua, ram, ramkomh le empire hna hi raltuknak in ser a rak si. Ralkap sernak le raltuk ningcang zong chan sining hoih in thlen a si. Atu chanthar ahcun technology ruangah raltuk ningcang zong a thancho ngaingai cang. Raltuknak cu khondennak, thihlohnak, inn le lo rawknak, tahnak le hramnak in a khat. A chiakha tuk mi thil a si nain a ruang a phunphun ruangah ral cu tuk a si. Raltuknak a dih tikah sining thar ah ram le miphun cu ser cio a si.

Chin miphun cu miphun puitling pakhat kan si tiah kan ti ko nain kan ram le kan miphun huap in kanmah tein rian kan ttuan bal rih lo. Mizoram (West Chinram) nih ral an tuk i remdaihnak an tuah hnu ah anmah tein khuakhan lairelnak zeimawzat an tuah kho. Chinland (East Chinram) zong chan a dotdot ah dohthlennak kan tuah ve i atu tiang kan pehzulh cuahmah. Independence kan hmuh kum 1948 January in 2021 January tiang kum 73 chung hi unitary cozah (democracy, dictatorship) tangah kan rak um. Kanmah tein zei hmanh lairelnak le tawlrelnak nawl kan rak ngeih lo i Khualipi lei zoh in khua kan rak sa.

Kumpi kum 70 hnu ah Chin miphun huap in cawlcanghnak a chuak. Kan Ramkomh huap in dohthlennak a chuak, cu chungah a hlei in Myanmar, Chin le Karenni miphun nih thawng ngai le cak ngai in kan cawlcang. Chin miphun cawlcanghnak hi amah chuak in chuakmi thil a si lo. Kum tampi chung ramriantuantu le dohthlentu hna nih an rak zuamnak theipar pakhat a si. Ramri le ramchung i cawlcanghnak le tonpumhnak pawl nih hrinmi a si. Atu caan te he aa tong i a chuakmi a si.

Raltuknak cu a chiakhami a si. Asinain, Chinland sersiam kan duh, Burma Ramkomh sersiam kan duh i hrialawk a tha ti lo. Tutan dohthlennak ah thawngtla kan um, ralzaam kan um, hmapumi kan um, nunnak pekmi kan um. Mindat le Thantlang khuapi kan chuah tak. Khuate tampi kan chuah tak. Chin miphun tuanbia ah a um bal rih lo mi miphun intuarnak nih miphun ifunnak cu a hrin. Peng le tlang nih doh khawhmi le tei khawhmi ral a si lo caah Chinland rampumhuap in kan cawlcangti hna.

Atu ah, Chinland ramkhel lei hruaitu ah Interim Chin National Consultative Council (ICNCC) kan ngei. Chinland runventu ah Chinland Joint Defense Committee (CJDC) kan ngei. A rauh hlan ah, Chinland kha kanmah tein khuakhan lairel khawh ding, tawlrel khawh ding le biaceih khawh ding in kan izuam lio pi a si. Chinland ca lawng si lo in Burma Ramkomh dihlak caah Ramkomh chungtel ram pawl he rian kan ttuanti. Tutan cu kan tei hrimhrim lai tiah zumhnak kan ngei.

Nihin ah, ralhrang pawl mawtaw tampi he Chinland an rak kaimi hi chaklei doh ding le thlanglei doh ding caah an ra mi a si lo. CNF or Camp Victoria doh ding ah an rami a si lo. Chinland chim dingah an rak kaimi a si. Chin miphun thah dingah an rak kaimi a si. Burma Ramkomh ah federal democracy um khawh lo dingin hrawh dingah an rak kaimi a si. Burma Ramkomh mipi dihlak kha a zungzal sal siter dingah an rak kaimi a si. Cucu Chin miphun dihlak nih raltha tein kan doh hna ding a si. Kan tinhmi kan i fiang caah nunnak kan thapmi a si.

Bawipa nih kan raltuknak ah A kan umpi tiah kan zumh. Teinak a kan pek lai timi zong kan zumh. Sihmanhsehlaw, raltuknak le ramsernak cu fawi tein hmuh khawhmi thil a si lo. Kan sining dihlak, kan caan dihlak, kan thazaang dihlak, kan chawva dihlak pek a hau. Thisen a luan a hau. Khua a rawk a hau. Intuar a hau. Kan duhlomi thil tampi kan tong rih lai. Chin miphun hi ral a tu cuahmahmi miphun kan si. Kan thinlung thawn a hau, kan ralthat a hau, harsatnak in khawh a hau.

Ralhrang nih mawtaw tampi he Chinland an rak kai. Chin miphun kan ralthatnak le kan ralchiatnak tutan ah ihliah usih. Chin khrihfa kan zumhnak le kan lungawtawmnak tutan ah ihliah usih. Pathian bochannak le miphun dang bochannak tutan ah ihlaih usih. Chin pasaltha kan timi hi hlan lio tuanbia chung lawngah maw a um? Ram le miphun dawtu vialte nih Chin kan sinak cu langhter caan a phan. Zeibantuk thil kan ton zongah a donghnak ah Bawipa thawngin teinak kan hmuh lai. Cucu kan zumh ahcun kan tei lai.

Cucaah, tutan cu buai lawlaw ko usih, itong lawlaw ko usih. Kan si a fah zongah thinlung sifah lo a biapi. Chin miphun nih zeizong te kan tuah khawh ve ko timi lungput ngeih usih. Chinland cu Chin miphun nih kan runven lai. Chinland cu Chin miphun nih kan pen lai. Bawipa nih Chinland le Chin miphun thluachuah pe ko seh. Laknak: The Chinland Post

Be the first to comment

Leave a Reply

Your email address will not be published.


*