Even.Tluang Lian nih Ramdang khuasa pawl nih Hakha khua a um an chungkhat hna zaam an fial mi hna a lungtling hrim lo

Ramleng a ummi nih Hakha a ummi nan chungkhat pawl kha, Hakha zaam taak dingin um thiam lo in nan rak fial hna! Ramchung a ummi nan chungkhat hna hi, zaam le zaam lo ding chia țha thleidan khawhnak tuaktan khawhnak an ngei ko. Hiti rumro, umthiam loin, Hakha khua a ummi nan chung le an duhlo, an huam lo bu tein khuate lei i zaam dingin nan rak fial lengmang hna hi, zeidah nan fim hlei i nan theih hlei? Pakhatnak mizer khu nan si. Pahnihnak, Hakha nan kan rawi a si. Pathumnak Miphun nan kan rawi a si. Nihin kan ram dothlennak ahhin, nan chungkhat cu pakhat hmanh Miphun tonmi harnak hi tong ve hna hlah seh tiah, a thli in khua nan khaan i nan kan zaam taak, nan kan pheu a si.

Zaam a herh le hawi sinah ta an zaam ve ko lai? Tuar a herh le hawi țuarmi cu an tuar ve ko lai ta? Ram le Miphun nih a tuarmi tuar ve duh lo i a thli te i zuh nan fialmi hna hi, BAWIPA PATHIAN zong nih a fihmi lungput a si. Hitluk a tar a no in Miphun caah țangrual a herh lio i, a himnak hmun ramdang in awlokchawng in aan umtertu hna hi khuachia a si. Khuachia nih an tukforh hna i um thiam loin Hakha khuasa nan chung le cu an huam lo buin nan zaam ter hna. Nihin Hakha cu PATHIAN Zaangfahnak in hmundang ka dang an tonmi hecun chim awk tlak hmanh kan tong lo.

THIANG THLARAU nih a chuah taak lomi khua, Carson le Laura Luruh a umnak khua hi, kan zaam taak dih ding a si ahcun, Chinmi ral kan sung tik lawngah a si lai. Cucaah, THIANG THLARAU nih a chuah taak lomi khua, BAWIPA lawnglawng a bochanmi tampi umnak khua, Carson le Laura luruh le an min umnak khua hi BAWIPA PATHIAN nih ven loin a um hrimhrim lo. Nihin kan dohmi ral hi an sung hrimhrim ti hi kan biakmi BAWIPA PATHIAN MIN in kan thanh hna. BAWIPA nih a kan dohpi caah kan ral hi kan tei hrimhrim hna lai tihi, BAWIPA JESUH KHRIH MIN in kan thanh hna.

Cucaah kha bantukin Hakha khua le Miphun cungah zer sualnak nan rak tuah cangmi kha nan sual rak i phuang ulaw, BAWIPA PATHIAN sinah ngaihthiam rak hal u. Miralchia sinah BAWIPA PATHIAN aa phuang bal lo. Miralțha profet Elisha umnak Samaria khua cu thaizingah BAWIPA nih zeitindah a khamh kha 2 Siangpahrang 6:24-33; 7:1-22 i kan hmuh bantuk khan, BAWIPA dawtmi hna umnak khua, nan rawimi Hakha khua hi, BAWIPA nih David chan Jerusalem a dawt bantukin, zeitluk indah a dawt le a ven kha nan hmuh lai. Chinram khualipi Hakha khua cungah BAWIPA cu Sunpar chin selaw, a cungah BAWIPA Daihnak um ko seh.  KHRIH Lamkaltu,
Tluang Lian (Martar)

Be the first to comment

Leave a Reply

Your email address will not be published.


*