Good News- CDF nih ceilak in ralhrang pawl an thah hna

Mizapi ralkap CDF Paletwa le Council ralkap ni thum chung pehzulh in an kap, Council ralkap a thimi an tam. CDF Paletwa le council ralkap kar ah 2021 November 9 in November 11 tiang ni thum chung kahdohnak a chuak i council ralkap lei minung 11 an thi tiah CDF Paletwa nih cathanh an chuah

CDF Paletwa rian ngei pakhat nih, “Ni thum chung pehzulh in kan i kap. Ni thum chung ah minung 11 kan thah hna lawng si loin hliam a tuar mi an tam.

Kan nih hi atu nai te in kan dirh mi a si ca ah hriamnam lei kan chanbau ngaingai. Atu zong hi kan naule minung pakhat ah kuan hnih thum tete lawng kan hmanter hna.

Kanmah lei cu kan him dih” tiah a chim. November thla chung ah nifatin in Chin Ramkulh ah kahdohnak a chuak i ralhrang lei hliam a tuar mi le a thimi an tam tiah kan theih.Cre=Thp

Thawngpang dang…..Khuathar ah Meithal in Kah a Tongmi Pu Mang Cin Ruakthlaknak. November 10 zaanlei muilai ah a Hakha Khuathar an inn ah meithal in kah a tongmi Pu Mang Cin (kum 39) ruak cu November 11 chun ah an thlak, tiah thawng kan theih.

US ah a ummi Pu Mang Cin te chungkhar pa pakhat nih, “Zaanlei muilai ah khan Pu Mang Cin a nupi hi thlanglei inn ah ka kal ta lai a ti i a vung kal. A rauh hlan ah meithal kah thawng a theih i inn ah a kir tthan. Inn a phak tik ah cun Pu Mang Cin cu an pokhlat ah a rak ril cang,” tiah a chim.

Pu Mang Cin hi Contractor rian a ttuan pahmi a si i, a nupi hi cozah zung rianttuan a si. Fa panga an ngei. Kha hlan ah khan Dalan tiah ralrin an rak pek bal tiah a chungkhar nih The Chin Journal ah an chim.

Pu Mang Cin Dalan a si le si lo kong ah The Chin Journal nih fehternak kan tuah kho lo. Ruakvui lai ah palik le ralkap pawl an ra i sibawi nih a ruak a check ta. Cu dih cun thlaan ah ttha tein an vui ko, tiah a cunglei upa nih a chim chap. – The Chin Journal

Be the first to comment

Leave a Reply

Your email address will not be published.


*