Hakha lei Phorhmi Ar 450 cu mibu 100 renh lo nih an chuh dih hna

Hakha lei ah an rak phorhmi ar 450 cu nihin zaanlei sml. 5:00pm hrawngah khan Hakha le Monywa karlak Nagamok Tlang zawn ah minung 100 hrawng a simi mibu nih an chuh dih hna, tiah ar chuh a tongmi Hakha khuasa chungkhar hna sin in thawng kan theih. Nihin October 13 ah Monywa in ar a phorh i Hakha ah a rak tlungmi Motor cu Nagamok Tlang ah a rawk i, cuka hmun ah cun mibu nih an ar vialte hramhram in an chuh dih hna hi a si.

Ar chuh a tongmi chungkhar pakhat nih, Monyaw in kan rak i thawh i Nagamok Tlang ah kan motor cu a rawk. Motor mongtu kan chiah ta i, a neih biknak hmun ah Motor hlan dingin kan kee in kan va kal. Motor kan hlan khawh i kan rak kir ah cun kan ar bawm le kan ar cu minung 100 tluk nih an rak tthial dih cang,” tiah The Chin Journal sinah a chim. Ar tlawmpal lawng i lak ding in le ar bawm tal chiah ta ding in an nawl len hna nain an duh lo pin ah an tlerh khawn hna.

Kan nawl len hna nain Ar hi cu i lak bang ko u law tlawmpal tal cu kan chiahtak ve uh kan ti hna zong ah an duh lo. Cun, ar hi i lak uh law arbawm tu hi kan chiahtak ko uh kan ti hna zong ah an duh hlei lo. Ar he arbawm he an cawi dih i lamthlang lei ah an kalpi thluahmah ko. Na kan pek lo cun nan nun him lai lo ti zong a kan ti,” tiah a chim chap. Ar an lakpiak mi hna hi a dih lak in 450 tluk a si i, ar paruk lawng an chiah ta hna.

Ar a chuttu mibu lak ah hin nu pawl zong an i tel. Ar a chuttu hna minung 100 hrawng hi hriamnam le meithal zong an i ken lo i khuami sawhsawh zong an si kho, tiah an ruah damh hna. Nagamok Tlang hrawnghrang hi atu bantuk in firtlai le mithah tibantuk a rak um pah lengmang nak hmun a si. Credit:The Chin Journal

Be the first to comment

Leave a Reply

Your email address will not be published.


*