MAH uico pawl nih fih nung an tuah i, thawngchia kan theih mi pathum hna

=Monywa ah PDF camp 2 ralhrang nih an lak khawh. Monywa peng ah ah a um mi Monywa Rangers camp pakhat cu tuzing ka ah ralhrang nih an luh hnawh hna i an lak. Cun a dang Comandos camp pakhat zong an lak tthan i mei an duah dih tiah theih a si. Camp ah an chiah mi uniform, Sii le thil dangdang tampi an lak dih tiah Monywa PDF pakhat nih a langhter.

Zeihmanh lo he ralhrang do ding in kan ra i, pehzulh in kan doh tthan ko lai. Tutan zong hi hriamnam ai thlau tuk ruang ah a si ko tiah a peh ri. Cre-Cin11news

=PDF He Nai Pehtlai Tiin Arakan Siangcachim (CDM) Nu Pakhat Ralhrang Nih Thlaih. Arakan( Rakhine) ramkulh, Taungkoh khua ah siangcachim nu pakhat cu PDF he nan i pehtlai tiin November 20 ahkhan ralhrang an rak tlaih.

Kum 40 tluk simi Daw Cherry Thet Si hi Taungkoh khuapi BEHS, No(2) ah siangcachim rianttuanmi si i, CDM a tuahmi si caah November 20 ahkhan ralhrang le palek nih a inn ah an luhhnawh i an tlaih hnu a tutiang pehtlaih khawh si rihlo tiah khuami pakhat nih chim.

Arakan ramkulh, Than Htwe pengkulh zong ah PDF he nan i pehtlai tiin kumtling rih lomi ngakchia pakhat tel in nu pathum le pa pahnih zong October thla ahkhan ralhrang nih an rak tlaih hna.

Cun, MyauhOo peng zong ah mino pakhat an rak tlaih chap i PDF he nan i pehtlai ti puh in Arakan ramkulh chung ah ralhrang nih tlaihmi minung 7 an si cang.Ref: RFA

=Kalaymyo, Tahan ah SAC Uico ralkap meithal kahnak ruang ah thinlung lei thazaang dernak tiang a ngei cang mi Salai Van Bawi Lian cu thla (4) chung a umnak theih a si ti lo, chungkhar an lungre a thei i a thih le nun hmanh theih a si lo caah mipi sin ah bawmh halnak zong an hun tuah hi asi. Salai Van Bawi Lian hi Kalaymyo, Tahan A Group ah a um mi, Pu Zomuana le Pi Lalrinmawii hna hi an fapa a si i an mah hi EFC Khrihfa bu member an si hna.

July 28, 2021 in khan Inn a lawi ti lo i atu tiang chungkhar nih a umnak zong an theih lo pin ah a thih le nun zong theih a si ti lo.

April thla lio i Tahan Sandah piahtu SAC ralhrang nih meithal in an kah hna lio, SAC ralhrang le mipi karlak meithal kahnak a voikhat nak a rak chuah lio ah khan Salai Van Bawi Lian hi a ke ah an rak khenh i hliam a rak tuar mi asi.

Cu hnu cun a thinlung lei zong ah thazaang dernak tete a ngei cang mi a si tiah a chungkhar nih an chim. A mah hi SAC ralhrang nih a ke ah an rak khen i Meithal hliamhma a tuar hnu ah rak velh chih mi a si. Ni tlawmpal ah Sizung an rak kal pi nain cu ahcun lungfim loin a rak um cang. Sizung ah chungkhar nih caan saupi an um ter, cun a dam cang tiah an rak lawi pi ahcun a thinlung a hlan bantuk a si ti lo, a dik tuk ti lo ti asi.

Cun inn ah holh tam deuh, thawngpang tam deuh a theih ahcun a celh lo, a thinlung a dik tuk ti lo caah thawngpang thawngdeuh zong cu a chei ti lo.

Cu ti cun inn ah tlawmpal a um mi July 28 in khan inn cun a chuak, cu thok cu a umnak zong theih ti loin nihin tiang a tlau thai hi asi. Chungkhar cu Salai Van Bawi Lian kong ruah ah an ngaihchia, an lungrawk i thinphan dai loin a um cang. Cu caah a hmu mi paoh nih phone number 09400534364၊ 09261330929 ah pehtlaihnak kan tuah hram uh, a konglam le thawngpang kan hlat pi cio hram uh tiah mipi dihlak sin ah nawlpat nak an tuah hi asi.

Be the first to comment

Leave a Reply

Your email address will not be published.


*